قرار صعب
دارالنعيم عابدين
تحدي الغربال للدخول إلى موسوعة غينيس
العام الماضي انا عملت إحصائية بين الغربال والمهاجمين في الدوريات الأفريقية وقد تفوق على عدد منهم في الأهداف، رغم ان الكثيرين قالوا لي هناك فرق بين الدوري السوداني والدوريات الأخرى لكن رغم انه هناك فرق لكن الاحصائية عملتها من حيث عدد الأهداف لكل مهاجم وهذا الذي عملته، لكن الغربال تراجع مستواه بشكل كبير، و غيابه عن إحراز الأهداف بقى اكثر، يعني في هذا الموسم شارك مع الهلال في تسع مباريات بدوري أبطال أفريقيا أحرز أربعة أهداف فقط، ثلاثة منها في التمهيدي وهدف في دور المجموعات بدوري أبطال أفريقيا، معقول مهاجم في دور المجموعات يلعب خمس مباريات يسجل هدف فقط، وفي الدوري لعب ثلاثة مباريات سجل هدف، الغربال خلي كل تركيزه على شعره، يعني بقي حتى يخاف يحتك بالمدافعين بقول يمكن واحد يقلع له شعره واحده وينقص،
هل هو مهاجم ولا "مصفف شعر" ، افضل له يمشي يفتح له صالون حلاقه، بنجح لانه بعرف كيف يهتم بشعره ويبقى طويل، يعني كثير من الشباب بقوا عايزين شعرهم يبقى طويل والغربال حيساعدهم، يعني حيقول ليهم انا عشان انا اصل لطول شعري ده لم يك الامر سهل، يعني تركت كرة القدم وركزت عليه بس، وعشان تصدقوا انه اهتمامي بشعري ده خلاني لعبت12 مباراة مع المنتخب ما سجلت اي هدف
ولعبت بطولتين ما سجلت هدف، كأس العرب وامم أفريقيا، كل تركيزه على الشعر حتى في التدريبات بستعرض الشعر مره يربطوا ومره يفكوا عشان الناس يعرفوا شعرو ده وصل لأي مرحلة، يعني لما المدرب بكون بشرح في الخطط هو بكون بعيد في اتجاه ثاني بسبب شعري ده، بفكر في الكريمات الجديده لتطويل الشعر.
الغربال مسافة يعمل زيت الزيتون وزيت الخروع وزيت جوز الهند ويخلطهم مع بعض ويعملهم لفترة تترواح بين 15 إلى 20 دقيقة، بعدها بجرب خلطة ثانية العسل مع عصير الليمون دي بعملها في الشعر لفترة تترواح بين 20لي 25، دقائق كثيرة، ده كله الغربال بفكر فيه يبقى كيف يفكر يسجل هدف، واللياقة البدنية عنده تراجعت يعني لو لاحظتوا من ربع ساعة الأولى للمباراة لياقتوا بتضعف ولما يصل الشوط الثاني بكون بعيد وقد يمسك الكورة مره او مرتين، شكلو سبب ضعف اللياقة دي انه اكله بعمل بيه خلطة لشعروا، يعني كان شاف زبادي وبيض ما باكلهم بعمل خلطة لشعروا لأنه الزبادي والبيض من خلطات تطويل الشعر، يعني حتى السلطة ممكن يخلطها كلها ويعملها في الشعر.
ولما يدخل الانترنت ما بحاول يتطور في كرة القدم او يشوف كيف تطور مستوى لاعبي كرة القدم، ما بشوف شئ غير فيديوهات تطويل الشعر واخر انواع الكريمات عشان كده ، ما فضل له إلا يقول ليكم اعذروني، يعني انا افكر في الكورة ولا شعري، لأنه شعري ده عندي أفضل من اني اسجل عشان كده لما ما اسجل ما تهاجموني ساي انا لسه ما فضيت في الكورة لانه عندي تحدي ادخل موسوعة غينيس لأكثر لاعب شعره طويل، يعني تسجيل الأهداف وتطويل الشعر الاثنين ما قدرت عليهم، لذلك اتجهت لي تطويل الشعر وخليت تسجيل الأهداف، اشتغلت على شعري كثير، ما بتصدقوا انه بهتم بالشعر اكثر من الكورة عشان كده حاتكلم ليكم بلغة الأرقام، 12مباراة مع المنتخب بدون تسجيل هدف، تسع مباريات مع الهلال سجل أربعة أهداف،نحن ما بهمنا شعر راسك حتى لو وصل لي رجيلك، لكن بهمنا انه لما يأثر على مستواك، كل تركيزك بقى على شعرك، وانت ما قدرت تعمل موازنه بين تطويل شعرك ومستواك، لذلك شعرك بقي طويل ومستواك بقى ضعيف،مع انه لو وصل شعر راسك لي رجيلك ما يهمنا ودي حاجه شخصية تخصك انت لكن لمن يصل لي مرحلة انه يفقدك تركيزك ويكون اهتمامك به اكثر من اهتمامك باحراز الأهداف بنتكلم، وكثير غيري لاحظو لهذه الناحية، سمعت اكثر من شخص من مختلف الأعمار بقول من الغربال ركز على شعره وبقي طويل مستواهو ضعيف، وفي مباراة صن داونز في واحد سمعك ليها عديل.
الغربال بعد يعتزل ما يترك الهلال يكون في الهلال ويفتح له صالون عشان يهتم بشعر اللاعبين ويوريهم خبرته عشان هو ضيع زمنوا في الشعر هم ما يضيعوا زمنهم ، وبعد اللاعبين ممكن يتوسع الصالون ويبقى لكل الناس ده نوع من الاستثمار انتو قايلين الاستثمار الا في بيع التيشيرتات فقط، صالون الغربال ده استثمار كبير ويمكن يحرر النادي من جيوب الأفراد ويكون الهلال عنده مصدر دخل، السودان ده مافي شئ ضيعوا غير وضع الاشخاص في اماكن لا يعرفونها عشان كده التغيير حيبدا من الهلال نشوف كل لاعب خبرته في اي مجال ونوظفو فيها عشان يكون متفرغ ليها ويحقق فيها نجاح ونشوف لينا مهاجم يستطيع إحراز أهداف لانه مهاجم يغيب 12 مباراة ويغيب بطولتين عن التسجيل ده معقول يكون مهاجم، خلاني اسأل الغربال مالو، انا اكثر من دعم الغربال وعمل له إحصائيات وتقارير لكن لمن يتراجع لهذه الدرجه لازم نتحدث، مهاجم الهلال دي كلمة كبيرة عشان كده لازم يكون قدرها، المهم بعد ده خلي الاهتمام بشعرك ده شويه واهتم بمستواك عشان تعود لتسجيل الأهداف.
