خضع محمد الرشيد لاعب المريخ لفحوصات جديدة في القاهرة اليوم الأربعاء تحت اشراف الطبيب أحمد عبدالعزيز، وأكدت الفحوصات أن اللاعب يعاني من تمزق في الرباط الصليبي الخلفي للركبة اليمني، وأوضح الطبيب أن اللاعب يستطيع العودة للتدريبات بعد شهر ونصف من جلسات العلاج الطبيعي، وسيبدأ اللاعب علاجه مباشرة حتى يعود للسودان في الوقت المحدد، وكان محمد الرشيد وصل القاهرة مساء أمس الثلاثاء.
في الاجتماع الفني لمباراة السودان ورواندا "الودية"
صقور الجديان بالأحمر واصحاب الارض بالاخضر
كيجالي: التيجاني محمد أحمد
انعقد ظهر الاربعاء بمقر الاتحاد الرواندي لكرة القدم الاجتماع الفني لمباراة منتخبنا الوطني الأول و التي يواجه فيها نظيره المنتخب الرواندي في اطار الاستفادة من نافذة الفيفا للعب الدولي بحضور الأستاذ ياسر الجعلي المدير الاداري لمنتخبنا والامين العام للاتحاد الرواندي والسيد جاكسون بريور المدير الاداري للمنتخب الرواندي وممثل الاتحاد الرواندي وممثل الحكام واعضاء اللجنة المنظمة بالاتحاد الرواندي بالاضافة الى مراقب المباراة.
وتقرر في الاجتماع ان تقام المباراة في السادسة مساءً بتوقيت السودان على ان يحضر المنتخبين في الرابعة وتم التأمين على ان يرتدي منتخبنا الوطني القمصان البيضاء بينما يتوشح اصحاب الارض بالاخضر والاصفر, واتفق الجانبان على ان تكون التبديلات مفتوحة خلال ثلاث فترات من زمن المباراة.
وتجدر الاشارة الى ان منتخبنا الوطني الأول يخوض تجربتين وديتين امام نظيره الرواندي خلال معسكره القصير بكيجالي مستفيدا من نافذة الفيفا للعب الدولي.
يا ود الشريف
ياسيد الدبابيس
نحن فى نادى الزومة نعرفك من زمان
رشحك دكتور تاج الشر بشير لتكون ناقل لاخبار ليق الخرطوم فى جريدة الايام ١٩٨٢ حيث كان المرحوم حسن أبو الدهب يغطى اخبار الليق عبر صحيفة الصحافة وانا كنت معه عضو لجنة الخرطوم الفرعية
طورت نفسك مافى شك
أصبحت من كبار كتاب الصحافة الرياضية
رغم مريخيتك الصارخة الا انك كنت ناقد كبير
تنصف الهلال
تنتقد المريخ ان كان هناك ما يستوجب
كبرت فى نظرنا نحن مشجعى نادى الزومة العظيم
العظيم دى خت تحتها مية خط
الكلام دا الجابو شنو يا عبدالخالق ود الشريف
اقول لك
عندما كانت الزومة تصارع فى التأهيلي للصعود للممتاز انت كتبت قلت الزومة دى بتحلم
الدنيا دى قامت وانقلبت عندنا جوة حوشنا
اتصل بك جلال احمد طه
ردك كان يعنى الزول ما يهظر
طوالى امبيرنا نزل
اها الزومة صعدت
وصلنا الممتاز
شغل جديد
بقينا مع الكبار
خبرتنا ليست ولابد
أعلنوا الدورى
جهزنا نفسنا
البداية كانت متعثرة
فقدنا ثلاثة مباريات ورا بعض
قمت انت عملت ايه؟
قلت الزومة دى راجعا الأولى راجعا
تحسبو لعب
طبعا دا استفزاز شديد مقصود او غير مقصود وانا أرجح الأخيرة
اها داير اقول ليك
زى ما ما قال غناينا
ان لبستى الطرقى ياك بت الفكى احمد
وان لبستى الفركى ياك بت الفكى احمد
دحين نحن فى الممتاز او درجة رابعة واحد
نحن نادى ذو رسالة
مش تحسبو لعب
واحد مننا قال الكورة هواء وجواها هواء
اقول لك
داخل النادى ثلاثة منظمات طوعية
واحدة تعمل للخدمات العامة
التانية شغالة فى دعم الفقراء من كيس صايم
وفرحة عيد وخروف ضحية
التالتة شغالة علاج عديل كدى
الأمراض المستعصية لها رجالاتها ككفاؤات او ممولين
جوة النادى داخلية بالمجان لطلاب الجامعات
وبعد يتخرج يقعد لإحدى ما يتوظف
النادى به مسجد تقام فيه الصلوات الخمس والاذان والإقامة
حاجة تعجب
النادى المقر الرسمى لجمعية الرياضيين الخيرية بالخرطوم
دونك
بلال عنبر
يحى مرسي
الامين الطيب
الخبير احمد فضيل
عصمت دفع الله
حسن نور الدين
دولى
محمد مختار
عنتر
بخيت عوض
هاشم الترمزى
حسن حتيكابى
بابكر حسب الجابو
عبدالمنعم صديق
وآخرين الله يعلمهم
التفصيل دا لأنك بتعرفهم
النادى المقر الرئيسي لخريجي مروى الثانوية
شنو بالله عليك
تصدق يا ودالشريف من عشرين لى خمسة وعشرين فطور جماعى خلال شهر رمضان الفضيل
يقوم به افخاذ وبطون الزومة وتتخله كلام وكلام
ياسلام
عضو النادى نحتفل به
هو خريج روضة
الأساس
الثانوى
الجامعة
الدراسات العليا
يعنى النادى منحوت فى عضمه دا
هسع جمعة بعد باكر دى محتفلين بطلاب الثانوى
علما بأن النادى يقدم لهم دروس تقوية مجانية
نحن ماب نحسبو لعب
الفريق الذى يلعب كورتين فى يوم واحد
دحين لاقاك زى دا
العصر فى استاد الخرطوم استجابة لنداء اتحاد الخرطوم
وبالليل فى استاد شيكان بالأبيض
درس مجانى فى العطاء والسخاء
هذا اسمه النادى الشامل
نادينا يجمع فى عضويته
جمال الوالى
صلاح إدريس
والان يتلقى الدعومات من رجالات الرياضة وعلى رأسهم رئيس اتحاد الخرطوم الشاذلى عبدالمجيد
والى الخرطوم عندما جانا وشارك فى احتفال الصعود
قال انا معكم حتى النخاع
نحن ما نحسبو لعب
الاسبوع الفينا دا
مشينا بربر لعبنا ضد أهلى شندى
ناس بربر ديل شالونا فى حدقات عيونهم
لهم التحية والتقدير
ديل واقفين من دخلنا لامن مرقنا
مشينا وين تانى
ماشين نلاعب أهلى مروى
دا بروفايل تانى
الولاية فى دنقلا
المدير التنفيذي فى مروى
كل أندية اتحاد كريمة
اتحاد كريمة ذاتو
خليك من دا
أهلى مروى صاحب القضية والشان ويعتبر
الزومة حقتو براهو
ناس الزومة دا كلام تانى
امس الفريق وصلهم بسلام
استقبال يفوق حد الوصف
باكر طابور الصباح فى المدارس عن ايه
رسالة فريق الزومة
رحلات من الكرو إلى الكاسنجر والسد
اصلو المباراه دى
نتيجتها معلقة فوق
ثلاثة نقاط محل يقعن يقعن
دى الزومة ومروى ذرية بعضها من بعض
نحن ما نحسبو لعب
نحن يانا ديل
د.هاشم خلف الله ميرغنى
مشجع فريقى أهلى مروى والزومة العظيمة
