الاعلامية دعاء عبادي التي فرضت نفسها بقوة في الساحة مؤخراً وذلك من خلال ثقافتها العالية وتلقائية أدائها، بجانب طموحها خلال الفترة الأخيرة اليوم في ضيافة ملاعب العاصمة نحب ان نعرف الكثير عن الاعلامية دعاء عبادي
السنتر الفنية : محمد عبدالباقي احمد
* البطاقة التعريفة؟
دعاء عبادي إعلامية اعشق مهنة الإعلام منذ الصغر سودانية عبابدة من بربر أصغر أخواتي يعني من الاخر كده (آخر العنقود)
* المراحل التعليمية ؟
درست جامعة الخرطوم كلية إعلام
* البداية الاعلامية كيف كانت؟
بدايتي الإعلامية كانت عبر برنامج اونير ٣ الذي كان يبث على شاشة قناة النيل الأزرق
وتاني ظهور لي بصورة رسمية كان تلفزيون السودان برنامج اهلا رمضان والفترات المفتوحة التي كانت تبث مباشر في التلفزيون القومي مع الاستاذ الكبير العظيم شكر الله خلف الله وله التحية اتعملت منه كتير جدا وكان دايما بساعدنا وبقدم لينا كل النصائح.
*ماهو أثر العائلة في حياتك الإعلامية ؟
دايما السند الحقيقي بالنسبة لي هو العائلة وبالأخص الوالدة ربنا يديها الصحة والعافية بتقدم لي النصائح وبستشيرها في كتير جدا في اي حاجة بتخص حياتي غير طبعا الاستشارات الإعلامية وكمان هي كان عندها تجارب إعلامية قديمة ف اول واحدة بجي احكي ليها لو اشتغلت اي حلقة وبسال عن رأيها وكمان اخواتي دايما برسل ليهم الحلقات وبسالهم عن رأيهم وكتير جدا بنتبهوا لي حاجات انا ما بشوفها وبنتبه ليها في المرات الجاية لمن اشتغل
* من يقف بجانبك ويمثل لك السند والدعم ؟
الوالدة اكتر واحدة بتسندني واقفة معاي وبتقدم لي كل الدعم.
*حكمة تؤمني بها ?
والله الزمن دا بقى زمن صعب شديد ف كل فترة بكون عندي حكمة بؤمن بيها الفترة دي بزات ماشة معاي( اتقي شر من أحسنت إليه)
*هل انصفتك الحياة ?
الحمد لله على كل حال اي حاجة كان نفسي اعملها ولا تحصل لي عملتها حتى لو بي نسبة بسيطة بس انا راضية كل الرضا عن حياتي والحياة صعبة جدا ما اي حاجة بتمناها بنلقاها أهم حاجة الإنسان يكون راضي والجميل في الحياة بتديك ذي ما انت بديها لو ضحكت ليها بتضحك ليك ولو اتفاعلت معاها بتتفاعل معاك واي حاجة بتجي من رب العالمين خير
* لم تكني مذيعه ماذا تتمنى أن تكوني?
عمري ما اتمنيت حاجة غير اني اكون مذيعة قريبة من كل الناس بي بساطة الكلمات وتلقائية الحوار والمفردات
* هل حصلت على شي تعتز به ?
انا بعتز بي كل حاجة حصلت عليها سواء في الدراسة أو في مجال الشغل وبعتز بي حياتي وبي كل المحيطين بي
* قدوتك في هذا المجال؟
كتر جدا منهم أستاذة ايمان دفع الله وأستاذة يسرية محمد الحسن وأستاذ طارق كبلو وأستاذ سعد الدين حسن وخارجيا بحب جدا مني الشاذلي
*قرار موفق في حياتك ؟
ادرس كلية الإعلام واصبح مذيعة ومقدمة برامج
*الإنتقادات كيف تتعاملي معها ؟
بسمع كويس جدا للانتقادات وبعمل بيها كترات جدا بكون في حاجات احنا ماشايفنها وغيرنا شايفها ف بعمل بالنقد البناء اما الردم ولا حتى بسمع ولا بركز معاه خالص
*من خلال تجربتك في اذاعة حواس كيف استطعتي كمذيعة أن تكتسبي المهارات والخبرة في المجال الإذاعي وكيف طورت من نفسك؟؟
حواس محطة مهمة جدا في حياتي والبرامج الإذاعية برامج قريبة جدا من الناس و احساس الليل كان برنامج تفاعلي اجتماعي خفيف اتناولنا كل المواضيع البتهم المجتمع السوداني في الحياة اليومية واستطاع أن يكتسب قاعدة جماهيرية كبيرة جدا وانا من اكتر البرامج البحبها البتكون مباشرة مع الجمهور لأني بكون قريبة منهم
*حدثينا عن تجربتك التلفزيونية في قناة امدرمان كيف كانت بدايتك وما هي البرامج التي قمت بتقديمها؟
قناة امدرمان الفضائية محطة مهمة جدا في حياتي قدمت عدد من البرامج منها (الناس والحياة. وبطاقة حب للجميع. الأيادي الطاعمة. أمير المساء) وعبركم بشكر الأب والمعلم والاستاذ حسين خوجلي كتير جدا بقدم لينا النصائح وأستاذ عصام الصايغ وأستاذ بكري المدني.
* استاذه دعاء اختفيتي من الشاشه عام كاملا لماذا هذا الغياب عن جمهورك ومتابعنك في قناة امدرمان؟
حصلت لي في خلال السنة الفاتت ظروف كتيرة جدا خلتني بعيدة من الاعلام لكن انشاء الله في الأيام القادمة حيكون في عدد من البرامج الاجتماعية المهمة ولنا عودة قريبا بإذن الله
* برنامج أسهم في نجوميتك؟
برنامج اونير كان الانطلاقة الأولى في حياتي الاعلامية وساهم في ظهوري
*ماهو الشيء الذي ظل في ذاكرتك وأثر على حياتك الإعلامية ؟
الإعلام مهنة صعبة جدا وعايزا جرى انا شخصيا تعبت عشان اصل للقنوات التلفزيونية ما كانت حاجة ساهلة بالنسبة لي وأخدت سنين من التعب والجري وقدمت في عدد من القنوات الفضائية بس اتغلبت عليها بالصبر لازم تصبر عشان تصل للحاجة الانت عايزا وكل ما كان حبك للإعلام كبير حتقدم مادة عظيمة وانا للآن ما وصلتا للمكانة الأنا عايزاها
*دعاء عبادي رسالتك كإعلامية
اقول لكل الاعلاميين والاعلاميات تحديدا انو من الصعب أن يقول الإنسان لأحد انه اعلامي من الصعوبة تحديدا ماذا يجب أن نعمل نحن ك إعلاميين واعلاميات وما هو دورنا أمام المؤسسات الإعلامية ف الإعلام يحتاج إلى برمجة وخطة وهذة البرمجة يجب أن تتطور وتتغير لنقوم بخدمة المجتمع فالاعلام رسالة خدمية مجتمعية اتمنى من كل الاعلاميين وضع خطتهم الخدمية الخاصة بهم
* كلمة أخيرة
انا حذينة جدا للوضع الوصل ليو السودان من انهيار في أسعار السلع الاستهلاكية وتضخم اقتصادي غير مسبق في تاريخ السودان نحنا كشعب سوداني نستحق أن نعيش حياة كريمة وآمنة بتنمي انو السودان يرجع ذي الأول واحسن من استقرار أمني ورخاء المعيشة، وبشكر صحيفة ملاعب العاصمة
ليست هناك تعليقات:
إرسال تعليق