قرار صعب
دارالنعيم عابدين
جيرالد خلي التاق يوم جاب قون
كل ما ادخل الفيس بوك القى المالاوي جيرالد فيري لاعب الهلال برد على تاق، يعني هو مافاضي من التاق اي
زول يعمل ليهو تاق طوالي يجي يرد، وكان ما مصدقين كلامي اسي اعملوا ليهو تاق طوالي برد، يعني اللاعب ده حتى في التمرين بفكر في الرد على التاق، يعني عادي المدرب بكون بشرح في الخطة وهو بفكر يقول الليله منو العمل تاق عشان ارد، التمرين ده مالو طول كده، خلص سرعة نحن راجينا تاق، وفي المباراة بكون سرحان بسبب التفكير في التاق،جيرالد خلي التاق يوم جاب قون في مباراة الهلال وهلال الفاشر.
التاق دي حاجه بتخصك لكن ما طوالي كده، تقول اللاعب في التمرين ماسك تلفونوا وكان لقى طريقه في المباراة يكون شايل التلفون عشان يرد على التاق.
انتم منتظرين شنو من لاعب كل تركيزوا على الفيس بوك وعلى التاق،ونحن قلنا نضع الشخص المناسب في المكان المناسب، يبقى جيرالد ده بعد الشطب طوالي يمسك صفحة الهلال على الفيس بوك ، لأنه بكون متصل طول اليوم ويرد على اي زول، على الاقل الصفحة بتطور اكثر، يعني هو مستعد يقرأ كل التعليقات والاراء ويشيل منها الايجابية ليستفيد منها، واي زول عمل تاق لأي لاعب في الهلال هو يرصدوا طوالي ويكلم اللاعب، لأنه خبرة في التاق، يعني جيرالد الانشغال بالتاق أثر على مستواه وعشان ما يأثر على اللاعبين قررنا نوظفوا في المكان المناسب بحيث يستفيد منه اللاعبين، لأنه هو ضيع زمنو ما ممكن اللاعبين يضيعوا زمنهم.
عدد كبير من لاعبي الهلال ما مركزين على كرة القدم، مركزين في اشياء أخرى عشان كده الفريق عاميين على التوالي يغادر أبطال إفريقيا وحتى في الدوري مستوى متراجع الفوز يحققه بعد صعوبه، أن شاء الله اللاعبين الذين تم تسجيلهم يكونوا مركزين على كرة القدم كما يقلبوها لينا وشم مع انه موجود الآن لكن ما عايزنوا اكثر ،لانه التسجيلات الماضية ما لقينا منها غير تطويل الشعر، ولبس الاكسسوارات، والقال ما فاضي للهلال، ولاعب الفيس بوك،ويقول ليك تراجع الفريق السبب المدرب ، يعني كل المدربين في الأعوام الماضية كانوا ما نافعين، في مدربين حققوا بطولات عديل مع انديه أخرى، عايزين بطولات اول شئ عالجوا تركيز اللاعبين، وخليهم يعرفوا انه البعملوا فيهو ده ما بجعلهم نجوم لكن ممكن يكونوا نجوم اكسسورات وتطويل الشعر والوشم لكن في كرة القدم مافي ليهم اي شئ، عشان كده يا لاعبي الهلال ركزوا على كرة القدم أفضل ليكم.
