الاعلامية والممثلة سماحه صلاح مكي فرضت نفسها بقوة في الساحة الفنية مؤخراً وذلك من خلال ثقافتها العالية وتلقائية أدائها، بجانب طموحها وحبها للهلال اليوم في ضيافة صحيفة السنتر الرياضية نحب ان نعرف الكثير عن الاعلامية سماحه صلاح مكي * البطاقة التعريفة؟
سماحه صلاح مكي
* المراحل التعليمية ؟
درست تقنية معلومات جامعة الرباط الوطني
* البداية الإعلامية كيف كانت؟
بداياتي في قناة أون لاين ميديا اتعلمت منهم الكثير الوقوف أمام الكامير دخلت معهم كورسات تقديم واخذت من قناة اون لاين ثقه كبيره في المجال الاعلامي وهم الفضل في ظهوري كمذيعه ونجاحي.
*ماهو أثر العائلة في حياتك الإعلامية ؟
صراحة أسرتي لقيت منهم كل الدعم والمساندة وتشجيعي لفريق الهلال جدي كان لاعب في فريق الهلال مكي اسماعيل الشهير بدريسه وهو علمنا كيف نحب الهلال كوطن وعلمنا كيف ندافع عن الهلال وايضا نقول كلمة الحق للهلال وانتعلمت منهم الكثير وهو السبب في حبي للهلال وانا مشجعه مخلصه للهلال السوداني، واجهتني صعوبات كتيرة ولكن الحمدلله كنت وما زلت مؤمنة تماماً بنفسي واني قادرة أحقق م اصبو اليه.
* كيف استطعت كمذيعة أن تكتسبي المهارات ؟
بالقراءة و كورسات الاعداد و التقديم .. كذلك الخبرة كل حلقة بحس اني افضل من التانية ... الانسان كلما قدم و اجتهد في عملو كلما بكتسب الخبرة الأكثر.
* من خلال تجربتك في قناة أون لاين ماهي مقومات المذيعة الناجحة من وجهة نظرك
إنو الشخص يكون مدرك بالحلقة البقدمها و يكون فاهم محتواها .. انا بعد الحلقة بصورة ممتازة و بكون ملمة بكل المعلومات .. كذلك القرءاة والكورسات مهمة جدا و بتساعد على النجاح ... اهم نقطة الالمام بمحتوى الحلقة المقدمة.
* ماهو الشيء الذي ظل في ذاكرتك وأثر على حياتك الإعلامية ؟
فيديوهات الهلال اثرت و دائما بلقى فيها قبول و احيانا رفض ... انا بدافع عن الهلال و اخر حاجة انتقدت الادارة في موضوع السماح للمريخ باللعب في استاد الهلال رغم اللافتات المسيئة و رغم تكسير كراسي الملعب ...
* سماحه الأخبار في الميديا تعلن أنضمامك إلى قناة البلد الفضائية؟
انا سعيدة اني اكون ضمن اي قناة سودانية .. القنوات حاليا متطورة و مواكبة عكس زمان كان بنقلوا الجوانب السيئة و قريبا حاكون ضمن قناة سودانية.
* سماحه حبك للهلال السوداني ? هل طموحك تكوني في مجلس الهلال ؟
انا بحب الهلال لدرجة بعيدة و ما بحب اكون في الادارة لاني ما برضى الغلط و بقولو الساكت عن الحق شيطان أخرس ... انا حاليا عضو في قطاع المراة بالهلال السوداني و لمن اشوف غلط اكيد ما ح اسكت على الحاجة دي.
* الهلال مقبل علي مباريات أفريقيا في بطولة أبطال أفريقيا رسالتك الي كل كيانات الهلال حتي يحقق الهلال الهدف المطلوب ؟
رسالتي الى كل لاعب يلعب كانها اخر مباراة و لازم يسعدو الجمهور و يكونوا على قدر المسؤولية و يلعبو بصورة جماعية وروح قتالية زي ما السعودية هزمت الارجنتين ... رسالتي للادارة عدم التدخل في التشكيلة ... رسالتي للمدرب انو يسجل اللاعبين البناسبوا معاهم فقط بدون تدخل اداري و انا بثق في فلوران و هو من افضل المدربين في افريقيا حاليا ... كذلك متخوفة من التحكيم و الادارة لازم تحسم الموضوع ده.
* سماحه الهلال لقب يتداول علي مواقع التواصل الاجتماعي
ده ناتج من حبي للهلال وانا حبيبة وابنة وصديقة الهلال و بقولوا الصديق وقت الضيق وانا ما برضى في الهلال حتى لو جدي مكي اسماعيل لو رجع الهلال ولعب كعب انا ح اطالب بشطبوا من الهلال.
* الهلال العشق الابدي لسماح صلاح كيف كانت بداياتك عشقك للازرق والمواقف التي واجهتك؟
انا اتولدت هلالابية زي ما انا مسلمة و سودانية .....من صغيري اتعلمت واتربيت على عشق وحب الهلال ... حب الهلال هو الخلاني اكون انسانة قوية و الهلال قواني في المجتمع و في الوظيفة قوى شخصيتي و خلاني اواجه و عمرو ما خلاني ضعيفة ... اي هلالابي مفروض يرفع راسه و الهلال جمهوره من كل فئات المجتمع من الدكتور حتى العامل البسيط.
* ماذا اكتشفت بعد دخولك الوسط الاعلامي ؟
الصداقات و الترابط و دعم الغير و المساندة ... انا بستصغر اي انسان يقول كلمة سيئة في الاعلاميين ... اي مكان فيهو الجيد و السيء.
* ما ردك على من يتهمك بالتحرر و الجراه ؟
انا جريئة فعلا في الحديث و الانتقاد و انا سعيدة بالحاجة دي و فخورة بنفسي انا ما بسكت و ما بخاف من الغلط ... بالنسبة للتحرر بشوف انو اي انسان لازم يكون في حالو فقط و عدم التدخل في خصوصيات الغير و المظاهر خداعه ما ممكن تحكم على شخص بدون ما تتعامل معاهو و تعرفو كويس ... انا بلبس حلو و بحب الموضة لكن ده ما مقياس للحكم على الانسان و مجتمعنا بعامل البنت غير البلد مع انو العقاب عند ربنا واحد
* ما هو الهدف من حضورك المتواصل على منصات التواصل الاجتماعي ؟
هدفي عموما في الظهور تقديم رسالة طيبة للمجتمع ما بظهر إلا في موضوع يكون بوجه رسالة للمجتمع
* ما رأيك في مسلسل سكة ضياع و الدور الذي قدمتي ؟
سكة ضياع بالنسبة لي افضل مسلسل سوداني كان بناقش قضايا كبيرة زي الخيانة و الشراب و السرقة ودور العائلة مع الابناء و الاهمال و عدم التربية و ده كان دوري انو العائلة كانت مادية لكن ما مهتمة بي تفاصيلي الخاصة مما ادى لضياعي و دي كانت رسالة للمجتمع و دور صعب شديد لكن انا وافقت اقدموا رغم الخوف من فهم المجتمع الخاطئ للشخصية و انا بشكر كل من ساهم في العمل الجميل اللي لم شمل المجتمع السوداني و ده فخر لينا
* ما هى الآثار السلبية التى جلبها سوء أوضاع الدراما فى السودان؟
الدراما حاليا ماشة في تقدم في منتجين ممتازين و صرف ممتاز و د بيؤدي لنجاح المسلسل ... سكة ضياع من الحاجات الكانت ناقصاها هو الانتاج ... زي مساكل الصور و الاضاءة و الصوت ... مسلسلنا القادم قشر موز حيكون ممتاز من ناحية الانتاج ... الممثل في السودان ما مقيم ماديا للاسف
* ممكن تحدثينا عن الاعمال الجديده فلم زندا ومسلسل قشرة موز التي سوف يبث في شهر رمضان الكريم
رمضان كريم على الجميع يعود علينا بالخير و البركة و بدن فقد و تصوموا و تفطروا على خير ... عملنا مسلسل قشر موز و انتهينا و حيعرض في رمضان ان شاء الله .. الفلم بس عملنا البرومو و حنكمل حاليا عشان يعرض قبل رمضان ... الفلم حيناقش قضايا كبيرة حاصلة في السودان و المجتمع السوداني و حيتعرض في سينما و كل الممثلين حيكونوا متواجدين في اول يوم للعرض
* كيف تقيمي أوضاع السينما فى السودان؟
الاوضاع حاليا ماشة في تقدم شديد ابتداء من مسلسل عشم و مسلسل سكة ضياع و ان شاء الله رمضان الجاي حتشوفوا اعمال ممتازة ترضي طموحاتكم
* قرار موفق في حياتك ؟
انا من النوع البستشير الناس في قراراتي بمبدا ما خاب من استشار .. لازم اشاور ناس البيت و خصوصا الام لانو اي كلام بتقولوا بكون صح ... الزواج فقط هو القرار الحيكون اخدتو براي لانو لازم يكون مبني على حب و ما ح استشير فيهو زول
* الإنتقادات كيف تتعاملي معها ؟
الانتقادات السلبية ما بتعامل معاها بصورة جادة .. و النقد الجاد و الهادف باخد منو و بستفيد جدا ... بحب الناس الايجابيين و بحبو الخير.
* حكمة تؤمني بها ?
ايه قرانية و هي قوله تعالى " وعسى أن تكرهوا شيئاً وهو خير لكم وعسى أن تحبوا شيئاً وهو شر لكم والله يعلم وأنتم لا تعلمون " اي حاجة في حياتي هي ل خير اي حاجة ما وصلتا ليها بقول لي خير
* هل انصفتك الحياة ?
الحمدلله انا راضية و مؤمنة بقضاء الله و قدره .. فقدت محمد اخوي لكن الحمد لله وهذه إرادة الله والمؤمن مصاب الحمد لله.
* هل حصلت على شي تعتز به ?
طبعا ... حب الناس و القبول من الناس ده فخر و تاج على راسي و انا بحب كل الناس بحب الهلالاب و بحترم المريخاب ... بكره المريخ لكن بحترم المريخاب و بعيش معاهم جو المناكفات و دي حاجة حلوة شديد انا كارثة للمريخاب اكتر من بشة.
* هل سببت الشهرة أي متاعب ؟
بالعكس الشهرة ما متاعب .. الناس بتحبني و بتحترمني و بتقدرني و انا مبسوطة شديد بالحاجة دي .. حب الناس مكسب و حاجة بتفرح شديد ربنا اذا احب عبد حبب خلقه فيهو و انا رزقي لقيتو في حب الناس لي
*رسالتك كإعلامية ؟
رسالتي بكون فيها محتوى الناس تتعلم و تستفيد منو ... نقدم رسائل توعية للشباب بالمخدرات و العادات السيئة لازم كلنا نقدم دور ايجابي للمجتمع لانو الشباب ضائع بالادمان ... انا بحب رسائلي تكون مفيدة غير كده معناها أنا إعلامي فاشل.
* كلمة أخيرة
بشكرك جدا للاستضافة و انا من محبي صحيفة السنتر الرياضية ودائما بتجيب الاخبار الجديدة .. انا بشكركم وبشكر جميع التيم العامل بالصحيفة وأنا سعيدة إني كنت معاكم و بتمنى ليكم كل الخير وكل الحب.
ليست هناك تعليقات:
إرسال تعليق