قرار صعب
دارالنعيم عابدين
لاعبى الهلال ما فاضين من الاكسسورات
الهلال واجه الأهلي ولم يستطيع الفوز عليه رغم ان الأهلي كان يعاني من الغيابات والإرهاق البدني، كنت اتمنى ان يفوز الهلال لكن كيف وبه لاعبين لا يفكرون في الفوز لاعبين يفكرون في اشياء أخرى، كأنهم يلعبون أداء واجب فقط وكأنهم مجبرين، غادر الهلال وهذا طبيعي لان الفريق منذ بداية البطولة لم يقدم ما يجعلنا نثق في انه يمكن أن يتخطي دور المجموعات،ماذا تنتظرون من لاعبين كل همهم الاكسسورات.
لاعبي الهلال حيروني، بقوا عارضين اكسسورات، شئ خواتم، وشئ غوايش، ما فضل ليكم الا تلبسوا زمام، وبيني وبينكم بعملوها، ماذا تنتظرون من لاعبين كل همهم بس لبس الاكسسورات، بركزوا فيها أكثر من التركيز على تطوير أنفسهم، يعني عادي ممكن لاعب يقول لي المدرب عندي ظرف خاص حاغيب عن التمرين، والظرف الخاص بكون ماشي يجيب له اكسسورات جديدة،نحن ما عندنا اعتراض على كل الاكسسوارات ان شاء الله تلبسوا زمام، تلبسوا "حجل"ما بهمنا، كل البهمنا انه تعطوا الهلال حقوا داخل الميدان زي ما أعطاكم حقكم كامل، يعني الزمن البتضيعوهو في شراء الاكسسورات لو منحتوا ربعه بس للهلال كان الهلال توج بابطال أفريقيا،يعني انا البنت ما بلبس قدر اكسسواراتكم دي، كثير من البنات بقوا براقبوا لاعبي الهلال عشان يعرفوا اخر الموضه في الاكسسورات،يجيني واحد يقول الحجل والزمام لي البنات، بقول ليك اللاعبين بقلدوا ساي مع انهم قريبين لل(........) أفضل تصمت.
ياريت لو كان على "الاكسسورات بس" كمان بقى فيها مشيط شعر" يعني عادي في بنات بقوا يمشوا لي الكوافير وتقول ليها عايزه اعمل شعري زي فلان لاعب الهلال"وزي ما قلت ليكم يا لاعبي الهلال تمشطوا شعركم، تعلموا كيرلي، تلونوهو، ما بهمنا لكن لما ده ياخذ من زمن الهلال وياثر عليه بنتكلم طوالي، فضل ليكم بس" الروج والمنكير" وده حتعملوه في الموسم القادم، عشان كده قلنا نلحقكم يا توازنوا بين كل هذه الزينة او تخلوا الهلال، الكاف ما بكتب لينا اللاعب ده لابس حلق، أو غوايش او مشط شعروا، الكاف بكتب بس اللاعب ده سجل هدف، أضاع هدف، شارك في كم مباراة، اخذ كم كرت، توج بكم بطولة.
عايزين تقلدوا اللاعبين الآخرين، قلدوا زي ماعايزين لكن قبل تقلدوا شوفوا هؤلاء وصلوا إلى أين وانتم أين، لأنهم بعملوا موازنة وانتم ما بتعرفوا تعملوا موازنة عشان كده ما تقلدوا ساي، لأنه من ما مسكتوا في الشعر والإكسسوارات كورتكم فكت،بقى في التمرين لاعبين الشعر مره يلف شعره، ومره يفك البانده او اللستكه، ومره ينزل الشعر في وشوا ما فضل له إلا يعطي شبال،ولاعبي الاكسسوارات مره يلبس في اليد اليمين ومره يشيلها يختها في الشمال، ومره يمشي الشنطة يجيب غيرها، ومره يغير الحلق، ده كله بحصل في التدريبات يعني كل التركيز على هذه الأشياء بس،تحدثت بلغة الجمع لانه ممكن تطلع لاعب بس أو لاعبين الباقي كلهم اكسسوار وشعر.
وانت يا القلت انك بتجهز لي عرسك وبيتك ومافاضي للهلال جاياك اصبر لي بس، لأنه كلامك ده وصلني، ولما وصلني من شخص ما صدقتوا لكن ثاني هناك شخصان قالا لي نفس الكلام بعد ده انا صدقتهم.
وانت يا العزمت صحبك العريس وزوجته ومعاك خطيبتك لي نص الليل وفريق الهلال عنده مباراة مهمة في دور المجموعات بدوري أبطال أفريقيا ما ناسياك، ولو واحد سالني جبتي المعلومات دي من أين، بقول ليك بنت خالة العروس صحبتي، كنا بنتونس وقالت لي لاعب الهلال عزم فلان وكذا، ما عندي اعتراض ان تعزمهم لانه ده من حقك، لكن ما من حقك تمشي تساهر نص الليل وثاني يوم عندك مباراة.
يقول إداراة ومدير كرة، لو مدير كرة بعرف شغل الاحتراف ما بخلي لاعب عنده مباراة يمشي يساهر في عزومه حتى لو كان العريس اخوه خلي صحبوا، ولسه في حاجات جايه ليكم عليها هذا قليل من كثير، ويقولوا ضوابط مشدده، مافي اي "ضوابط" لانه كلمة ضوابط دي فقط في الاعلام لكن تنفيذ مافي.
أجلت كل شئ عشان ما نشتت تركيزهم وقلت يمكن تتعدلوا لكن لما ما اتعدلتوا بعد ده كله بظهر، اذا انتم ما عندكم قيمة للهلال وما عارفين شعاروا وما بتحترموا نحن بنحترموا وعارفين قيمته، عشان كده جاياكم واحد واحد، و بالاسم لانكم ما بتستاهلوا بعد العملتوهو تلمسوا تيشرت الهلال خلي ترتدوه، انت يا عضو لجنة التطبيع نادي الهلال، كان في يوم مباراة مهمة للهلال بدل تكون قاعد مع اللاعبين، جايب ليك بنت وحايم معاها في الإستاد، حسستني كأنها وزيره وجاية تتفقد ملعب الهلال، انا بمشي الملعب بهدوء وبطلع بهدوء وكل ما امشي تلاقيني بلاوي، لو كلموني بيها ما بصدقها لكنها بتحدث قدام عيني، هناك أعضاء ما يستحقوا يجو عابرين باستاد الهلال خلي يكون أعضاء مجلس إداراة، وانت يا عضو الإدراة الكنت بتضحك بأعلى صوت لما ماميلودي صن داونز الجنوب أفريقي لكرة القدم سجل الهدف الثالث جاياك ماناسياك، لمن شفت ضحكوا قلت لي صحفية جمبي انت الهلال سجل الهدف الرابع ولا كيف، قالت لا، لأنه كنت مستغربه الهلال خسران وانت تضحك بلا خجل، يعني اللاعبين لما يشوفوك بتضحك لهذه الدرجه والفريق مهزوم ما بكون عندهم اي دافع عشان يفوزوا، لكن لما يشوفوا حزنك بجتهدوا اكثر عشان يزيلوا هذا الحزن،الهزيمة ما حارقاك على الاقل مثل ساي، مع انكم خبرة في التمثيل، كمان التمثيل ده خلوا جايه لكم بيهو بملفات ثانية، وانت يا من سجلت لاعب للهلال وما شفت له أي مباراة، عشان تقسموا المبلغ مع بعض انتم ثلاثة،جايكم ما ناسياكم،له حق الهلال يغادر للعام الثاني على التوالي من دور المجموعات بدوري أبطال أفريقيا بسبب هذه الاشياء التي لا تشبه الهلال.
ليست هناك تعليقات:
إرسال تعليق